الموضوع مش بس له علاقة بأكتر من 50 مليار جنيه هيدخلوا البلد ، لأ وهيأسس إقتصاد قوي يشغل الوف من الشباب والبنات ، ويمنع التهريب ويحط رقابة علشان ضمان جودة المنتج ، ونواجه بجد خطر الانواع القذرة المتخلطة بكيماويات خطير أو المخلقة كلها من كيماويات واهمها طبعا الاستروكس والفودو..

ايوه المقصود هو الحشيش اللي بيدخل مصر بالتهريب بأطنان بمزاجك أو غصب عنك ، من ايام ما اتسست ادارة لمكافحة المخدرات من 90 سنة ولغاية دلوقتي التهريب شغال والتجارة السرية الحرام بتشفط المليارات دي لصالح التجار واللصوص والمهربين .

التقنين ببساطة يطلّع كل مفردات زراعته وصناعته وبيعه للعلن ،وهترف تحاسبهم وتحط قواعد  ، وعلى الأقل محدش هيتسجن علشان كام جرام ولا يموت علشان ضرب حاجة مجهولة المصدر ومسممة، واللي عايز يدخنه هيروح لأمكان معتمدة مش هيعرض نفسه للخطر ويروح يسكور من ديلرات اغلبهم سوابق وممكن يتعرض لخطر الموت احياناً ، وبالطريقة دي هتضمن الدخل الضخم اللي بتدره الصناعة العظيمة دي وتعرف ازاي تشغل ايدي عامله في الزراعة والصناعة ، زي ماهو حاصل في بلاد كتير ومنها بلاد عربية بتعتمد عليه ضمن دخلها القومي .

خلونا نفكر بالعقل .. وماتقلقش هيبقى فيه إشراف عام وصحي وتقدر تستخدم جزء من مخرجاته في دعم صناعة الأدوية اللي بتحتاجه بالفعل ، وهتضمن على الأقل مستوى أسعار في المتناول ، بدل ما العيل مايقدرش يدفع 500 جنيه في قرش من الكويس ويروح يضرب استروكس مميت علشان سعره على قده ، ولا شريط برشام يغيب ذهنه ويخليه يرتكب جرايم وهو مش دريان ..

وبلاش حد يقول كلام قديم مستهلك عن أضراره على الصحة والجو ده، لأنه مش صحيح بالتأكيد ، أضرار الأكل أكتر منه بكتير أساساً ، واللي واخد الموضوع جد ممكن يقرا آخر دراسات اتعملت في جهات علمية مرموقة ، وكلام أطباء وخبراء كبار ،أغلبهم نفى إن له اي اضرار واتكلم عن فوايده الكتير (القنب الهندي أو الماريجوانا) وكل اللي اتكلموا عن تأثيره على ضمور المخ لسنوات عديدة بيفتوا وخلاص لأن مفيش دراسة علمية أثبتت الكلام ده .

وممكن ببساطة نقارن بينه وبين السجاير والخمور المصرح بصناعتها وبيعها وشربها عادي وبعدها نتكلم .

الحشيش باختصار سلعة مهمة وجالبة للسعادة ومطلوبة من ملايين ، وبتستخدم من مئات ( وربما آلاف ) السنين ، ومش هنيجي أحرص على المواطن من دول كتير متقدمة قننت بيعه وزراعته تحت رقابة ، والفلوس بدل مابتتصرف رشاوي وتسهيلات للتهريب وارباح ضخمة في جيوب تجار محدش يعرفهم ، تتصرف في النور وتستفيد بيها البلد ...

قننوه والنبي
 --------------
بقلم: خالد الدخيل